میں چاہتا ہوں مری شاعری کو رستہ دیں

اردو شاعری ولی دکنی ، غالب ، اقبال اور فیض سے ہوتی ہوئی موجودہ عہد میں ظفر اقبال تک آ پہنچی ہے ۔ اس دوران شعراء کی ایک کثیر تعداد ہے جنھوں نے شعری پیرائے میں اپنی فکر کا اظہار کیا ۔ اور ادب پر اپنے اثرات مرتب کیے ۔
یہ عہد جہاں سیاسی ، سماجی اور معاشی سطح پر تاریخ کی انتہائی زوال پزیر سطح پر ہے ۔ وہیں اس کا اظہار ادبی رویوں ، تنقید اور پیرایہ اظہار میں بھی نظر آتا ہے ۔
ادبی تنظمیں جا بجا موجود ہیں ۔ ہر شاعر معروف شاعر ، جدید لہجے کا شاعر اور صاحب کتاب شاعر ہے ۔ شامیں منائی جا رہی ہیں ۔ اعزاز میں مشاعرے ہو رہے ہیں ۔
صدر ، مہمانِ اعزاز اور مہمانِ خصوصی بنائے جا رہے ہیں ۔ شیلڈز ، میڈلز اور ایوارڈز بانٹے جا رہے ہیں ۔ کتابوں پر مضامین لکھے جا رہے ہیں ۔ ٹی وی اور ریڈیو پر انٹرویو ہو رہے ہیں ۔ مختصر یہ ہے کہ ایک ہڑبونگ مچی ہوئی ہے ۔ اور وہ گرد و غبار ہے کہ الامان و الحفیظ ۔۔
اور اس سب میں اگر کچھ موجود نہیں ہے تو وہ اعلی اور جدید عہد کی شاعری ہے ۔
رفیع کا شمار ایسے شعراء میں ہوتا ہے جو اس شور شرابے ، ہاؤ ہو اور مشاعرہ بازی سے الگ اور دور ہو کر پوری سنجیدگی کے ساتھ اپنے کام میں مصروف ہے ۔
وہ تو خود کہتا ہے :
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اپنی آواز گنوانے کی ضرورت نہیں ہے
شور میں شور مچانے کی ضرورت نہیں ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رفیع رضا ادب میں موجود کسی گروہ سے تعلق نہیں رکھتا ۔ بلکہ وہ گروہ بندیوں کے خلاف ہے ۔ وہ چاپلوسی ، خوشامد اور انجمنِ ستائشِ باہمی کے تحت بڑا شاعر نہیں بننا چاہتا ۔ وہ اپنے فن ، فکر اور طرزِ اظہار کی بنیاد پر اپنی جگہ کا تعین چاہتا ہے ۔۔
اور ادبی جگادریوں سے مخاطب ہو کر کہتا ہے کہ:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حضور! تھوڑا ھٹیں ، زندگی کو رستہ دیں
یہ مجھ تک آتی ھوئی روشنی کو رستہ دیں
کسی کو دیں، کوئی آزادیِ زبان و بیان
جسے بھی روکا ھُوا ھے اُسی کو رستہ دیں
مجھے ستائیشِ رسمی سے کوئی کام نہیں
مَیں چاھتا ھُوں مری شاعری کو رستہ دیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہی وجہ ہے کہ ادب کی مسند پر بیٹھے ہوئے جگادری اسے پسند نہیں کرتے ۔ اور ہر ممکن کوشش کرتے ہیں کہ اس کا راستہ روکا جائے ۔ اس کی شاعری اور فکر کو عام نہ ہونے دیا جائے ۔ کیونکہ ایک معیاری اور بلند تر سطح کی شاعری کو دیکھ کر لوگ ان کی کم تر سطح کی شاعری پر واہ واہ نہیں تھو تھو کریں گے ۔۔
رفیع رضا ایک بے چین روح ہے ۔ شاید اسے خود بھی نہیں معلوم کہ وہ کیا بنانا چاہتا ہے ۔ لیکن یہ طے ہے کہ وہ اپنے گرد وپیش اور موجود و میسر سے مطمئن نہیں ۔۔ اور اسے بدلنا چاہتا ہے ۔۔ لیکن اس کے لیے وہ محض شاعری پر قناعت نہیں کرتا ۔ بلکہ ہر طریقہ استعمال کرتا ہے ۔۔ جو اس کی دسترس میں ہے ۔۔ وہ نہ صرف کھرے ، بے باک اور دو ٹوک اشعار کہتا ہے ۔۔ بلکہ برملا اور بے رحمانہ تنقید بھی لکھتا ہے ۔۔
اسی طرح اس کے موضوعات بھی محض ادبی نوعیت کے نہیں ہوتے ۔۔ وہ سیاسی ، سماجی اور مذہبی موضوعات پر بھی کھل کر اظہار خیال کرتا ہے ۔۔ جھوٹ اور منافقت کے پردے چاک کرتے ہوئے بہت سے تقدسات کی دھجیاں بھی بکھیر دیتا ہے ۔۔ اسی طرح وہ اپنے گرد وپیش کو بدلنے کے لیے محض قلمی جنگ کو ہی کافی نہیں سمجھتا بلکہ عملی طور پر لوگوں کی مدد بھی کرتا ہے ۔ اور دوسروں کو اس کی ترغیب بھی دیتا ہے کہ اس طرح دنیا سے شاید کچھ دکھ مسائل کم کیے جا سکیں ۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لکھ رہا ہوں کہ اندھیروں کا مخالف ہوں میں
دیکھئیے کتنے چراغ اور جلا پاتا ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اس کا خاندانی پس منظر کے لحاظ سے "احمدی” ہونا اور مذہب پر جارحانہ انداز سے تنقید کرنا اس کے لیے بہت سے مسائل کا باعث ہے ۔۔ اس وجہ سے اسے گالی گلوچ کا نشانہ بنایا جاتا ہے ۔۔ اور مختلف حربوں سے اذیت دی جاتی ہے ۔۔ جان سے مار دینے کی دھمکیاں بھی دی جاتی ہیں ۔۔ اگر وہ پاکستان میں ہوتا تو اب تک قتل ہو چکا ہوتا ۔۔
ہم عدم برداشت اور انتہا پسندی کے جس عہد میں زندہ ہیں ۔ اس بات کا خدشہ موجود ہے کہ اسے مستقبل میں قتل کر دیا جائے ۔ اس کے چند اشعار دیکھئیے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خدا بناتا ھُوں، پھر اُس کا ڈر بناتا ھُوں
مَیں جتنا نیک ھُؤں ، اُتنا ھی شر بناتا ھُوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مرے لہو سے وضو اور پھر وضو پہ وضو
ڈرا ہوا ہوں زمانے تری نماز سے میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تلوار تو ہٹا مجھے کچھ سوچنے تو دے
ایمان لاؤں تجھ پہ کہ جزیہ ادا کروں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ضیاءالحق کی آمد کے بعد پاکستان میں جس طرح مذہبی بنیاد پرستی کو مسلط کیا گیا ۔ اور ہر ادارے میں رجعتی خیالات کو پروان چڑھایا گیا ۔ اس سے سماج میں کسی حد تک جو روشن خیالی ، شخصی آزادی اور رواداری موجود تھی ۔ وہ بھی ختم ہو گئی ۔ تعصب ، تشدد اور مذہبی قتل و غارت جس کا آغاز ضیاءالحق نے کیا تھا ۔ وقت کے ساتھ بڑھتے ہوئے آج اپنے عروج پر ہے ۔۔
اس ساری صورتحال کو اگر کوئی شعری قالب میں دیکھنا چاہتا ہے تو اسے میں رفیع رضا کی شاعری پڑھنے کا مشورہ دوں گا ۔ سیاست کے ساتھ مل کر مذہب نے جو چنگیزی دکھائی ہے ۔۔ اس کی جھلکیاں رفیع رضا کی شاعری میں جا بجا نظر آتی ہیں ۔۔ لیکن کہیں بھی ان میں سطحیت نہیں ہے ۔ یہ موضوعات بھی پورے ادبی لوزمات کے ساتھ آئے ہیں ۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خطا معاف اندھیرا تو پھر اندھیرا ہے
ٹپک رہا ہے لہو آپ کے اجالوں سے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جن کو دعوی تھا شعاعوں کی پرستاری کا
ان کی دہلیز پہ سورج کو مرا پاتا ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوچتے کیوں نہیں یہ جسم اُڑانے والے
کُچھ پرندے نہیں ھوتے کہیں جانے والے
خُود بھی بارود کے سامان پہ بیٹھے ھُوئے ھیں
اپنے ھمسایوں کے گھر بار جلانے والے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وُھی مِنبر، وُھی الفاظ وُھی فتویءِ کُفر
وُھی داڑھی ، وھی جُبے ھیں پُرانے والے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رفیع رضا کی شاعری متنوع جہات کی حامل ہے ۔۔ جہاں وہ مذہبی اور سیاسی موضوعات کو اپنی شاعری کا حصّہ بناتا ہے ۔۔ وہیں عشق و محبت کا موضوع بھی اس کے ہاں موجود ہے ۔۔ جدید سائنس ، فلسفہ ، نفسیات ، سماجی تعلقات ، ادبی رویے غرض کوئی ایسا موضوع نہیں ہے جس کے حوالے سے اس کے ہاں اشعار کی کمی ہو ۔۔
اس ہاں سب سے زیادہ متاثر کن ادبی قدر ندرت خیال اور بلا کا تخیّل ہے ۔۔ عام شعراء کے تخیّل کی پرواز کی انتہا سے وہ اپنی پرواز کا آغاز کرتا ہے ۔۔ اعلی سطح کے تنقیدی شعور سے وہ نہ صرف دوسرے شعراء کے شعروں کے پرخچّے اُڑاتا ہے بلکہ یہ خوبی اس کے اپنے شعروں میں ایک آفاقی قدر بھی پیدا کرتی ہے ۔۔
اسے آج کے عہد اور اس کے لسانی تقاضوں کا بخوبی اندازہ ہے ۔۔ اسی لیے وہ نامانوس الفاظ ، جناتی تراکیب اور دقیانوسی علامتوں سے دامن کو آلودہ نہیں ہونے دیتا ۔ بلکہ قاری کو لسانی سطح پر بھی ایک نئے ذائقے سے آشنا کرتا ہے ۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وار اس نے کیا ہتھیلی پر
خود کشی کی لکیر بھی نہ رہی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وقت پیچھے پڑا ہوا ہے مرے
تیزیاں کام تو دکھاتی ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یا علی کہنے سے پہلے میں بہت مشکل میں تھا
اور مشکل بڑھ گئی ہے یا علی کہنے کے بعد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جس قدر چاہا اس قدر روئے
عمر ہنسنے کی تھی مگر روئے
میرے رونے سے کچھ نہیں بدلا
اب کوئی اور معتبر روئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تو آسمان بھلا سَر پہ کیسے رھنا ھے
اگر سلوک زمیں سے بُرا کریں ھم لوگ
ھمیں تو دین سے تُم نے نکال ڈالا ھے
تُمھارے حق میں بھلا کیا دُعا کریں ھم لوگ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رفیع رضا کا شعری مجموعہ ” ستارہ لکیر چھوڑ گیا ” کے عنوان سے منظر عام پر آ چکا ہے ۔۔ جسے سنجیدہ قارئین پسندیدگی کی سند دے چکے ہیں ۔۔ شنید ہے کہ دوسرا شعری مجموعہ بھی منظر عام پر آنے والا ہے ۔۔
رفیع رضا سے فکری اور ادبی اختلاف کیا جا سکتا ہے ۔۔ اور کیا جانا بھی چاہئیے ۔۔ لیکن اس بات سے انکار ممکن نہیں کہ وہ جدید شعری منظر نامے پر ایک چمکتا ہوا ستارہ ہے ۔۔ جو کسی قدر بادلوں کی اوٹ میں ہے اگر اسے راستہ ملا تو بہت سے سیاروں کی روشنی ماند پڑ جائے گی ۔۔
اس کی غزلوں سے انتخاب دیکھئیے :
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فقیر و فُقر ندارد، سگانِ دھر بھی گُم
گلیم و جُبّہ و دستار بھی کلیشے ھے
کوئی زلیخا نہیں اور کوئی نہیں یُوسف
یہ سارا مصر کا بازار بھی کلیشے ھے
طلسمِ ھوش رُبا کا کوئی جواز نہیں
امیر حمزہ و عیّار بھی کلیشے ھے
نہ شاہِ وقت ، نہ شہزادیاں نہ کوئی غلام
اور اُن کے ساتھ یہ دربار بھی کلیشے ھے
بہشت و دوزخ و برزخ کا ذکر کُفرِ عظیم
گُناہ گار و خطا کار بھی کلیشے ھے
نہ وُہ مدینہ ، نہ مکّہ، نہ غارِ ثَور و حِرا
نفاق و مومن و کُفّار بھی کلیشے ھے
وجود ِ کوہِ ندا کا اُدھر ثبوت نہیں
اِدھر یہ کوچہءِ مسمار بھی کلیشے ھے
بچا نہیں ھے کنارہ کوئی جُگالی سے
اسی طرف نہیں، اُس پار بھی کلیشے ھے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سمجھ رھی ھے جو دُنیا، نہیں سمجھتا مَیں
مگر کسی کو بھی جھوٹا نہیں سمجھتا مَیں
جہاد کرتا ھُوں اپنے قلم کے ساتھ مگر
کسی دلیل کو جھگڑا نہیں سمجھتا مَیں
یہ درمیان کا پردہ ھے جب اُٹھے سو اُٹھے
اسے بس آنکھ کا پردہ نہیں سمجھتا مَیں
بس ایک بات تُمھاری مُجھے پسند نہیں
تُمھارے ھجر کو اچھا نہیں سمجھتا مَیں
تُمھارے جانے سے کُچھ اور تو نہیں ھوتا
بس اپنے آپ کو پُورا نہیں سمجھتا مَیں
دُعائے وصل کو پڑھ پُھونکتا ھُوں آنکھوں پر
کہاں ھے کونسا موقع، نہیں سمجھتا مَیں
جلا ھُوں آپ تو پھر یہ زُبان سیکھی ھے
کسی چراغ کو گُونگا نہیں سمجھتا مَیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سے مَیں کیا کروں مَیں اس سے بہتر چھوڑ آیا ھُوں
یہی کہتا ھُوا سارے مناظر چھوڑ آ یا ھُوں
جزیرہ ھُوں اور اپنے آپ اُبھرا ھُّوں مَیں پانی پر
سمندر کون ھوتا ھے سمندر چھوڑ آیا ھُوں
میں پہچانا نہیں جاتا تھا اتنے سارے لوگوں میں
اکیلا آ گیا ھُوں اور لشکر چھوڑ آیا ھُوں
مری آنکھوں میں رستہ ھے مرے بالوں میں مٹی ھے
جو پیروں کو پکڑتے تھے وُہ پتھر چھوڑ آیا ھُوں
سرِ میداں مَیں دُشمن کی لُغت میں مُنفرد ٹھہرا
جو بازی جیت سکتا تھا برابر چھوڑ آیا ھُوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بس آنکھ لایا ھُوں اور وُہ بھی تَر نہیں لایا
حوالہ دھیان کا مَیں مُعتبر نہیں لایا
سوائے اسکے تعارف کوئی نہیں میرا
میں وُہ پرندہ ھُوں جو اپنے پر نہیں لایا
نجانے کس کو ضرورت پڑے اندھیرے میں
چراغ راہ میں دیکھا تھاگھر نہیں لایا
مُجھے اکیلا حدِ وقت سے گُزرنا ھے
میں اپنے ساتھ کوئی ھم سفر نہیں لایا
گُلِ سیاہ کِھلا ھے تو رو پڑا ھُوں میں
کہ روشنی کا شجر بھی ثمر نہیں لایا
شُمار کر ابھی چنگاریاں مرے ناقد
کہ مَیں الاؤ اُٹھا کے اِدھر نہیں لایا
مری روانی کی اب خیر ھو مرے مالک
ستارہ ٹُوٹ کے اچھی خبر نہیں لایا!
بھنور نکال کے لایا ھُوں میں کنارے پر
مُجھے نکال کے کوئی بھنور نہیں لایا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ مختصر پوسٹ ایک بھر پور تنقیدی مضمون کا متبادل نہیں ہو سکتی ۔۔ اور نہ ہی یہ رفیع رضا کی شاعری کا ایک مفصّل جائزہ ہے ۔۔ بلکہ بعض پہلووں کی جانب محض ایک اشارہ ہے ۔۔ جو تفصیلی مطالعے کے متقاضی ہیں ۔۔ اس کا مقصد سنجیدہ قارئین کو جدید اور اعلی سطح کی شاعری سے روشناس کروانا اور ناقدین کی توجہ دلانا ہے کہ وہ ادبی گروہ بندیوں اور مذہبی تعصبات سے بالاتر ہو کر جدید عہد کی شاعری کو تنقید کا موضوع بنائیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ بات طے ھے رضآ جب تُو دھیان کھولے گا
تو اسکے بعد تُجھے تیرا گیان کھولے گا
تُو خُود کو باندھ رھا ھے عجیب جدت سے
رضآ تُجھے کوئی اھلِ زُبان کھولے گا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خیر اندیش: محمد رام سنگھ